马议员,咪走数

作者: 来源:发展规划 时间:2020-01-03 07:26:16 浏览(754)

坦白讲,政治上,Wiki事件已经烧完了。因为Hello Kitty领袖一于话之你,我行我素,讲咗就做,睬你都傻。佢睇死香港人虽然口口声声话要有选择,但唔会支持Wiki到一个抛头颅洒热血掟电视之地步。你可以话香港人抵X死,因为当香港人连民主都唔肯走多半步支持佔中,更何况要站出来捍卫电视选择权?

有成十万人出来,点解唔会迫到政府重新发牌?因为道理好简单,Hello Kitty领袖同粉丝们知道,无论西环小明点样憎恨、讨厌,抑或爱护及支持佢哋都好,都唔会因为一个Wiki而令到呢个政府倒台。三中全会杀埋身,个个共产党员都等紧最高指示。响呢一刻上面未有最新指示之前,西环一定兼且必然会撑Hello Kitty领袖,而且必然要好似猪肉咁样,砌足理据,确保西环笃住嘅立法会议员,到时有足够「理据」砌瓜特权法案。

经过权威到好威嘅消息人士,用足三个星期,终于砌够八个理由,将八盘猪肉拿出来俾建制派立法会议员,等佢哋响立法会开会嗰阵,车轮地砌。当然你会问,既然猪肉有足八盘,点解唔一早向公众讲出来?呢样嘢已经唔重要,因为家下最紧要嘅係政权保卫战,今日打爆泛民嘅特权法案先。至于盘猪肉砌得靓唔靓,已经唔重要。

Hello Kitty领袖同佢粉丝,搞管治一塌糊涂,但政治小动作唔会太差。佢哋明知西环一定出手救佢哋,佢点会向Wiki投降,係未?好嘞!今次西环终于输俾Hello Kitty领袖,响最后关头,西环都係要挺Hello Kitty领袖,係未?

所以,今次立法会议员之取态好重要,自由意志响呢度可以发挥到几多功效呢?本地工商界今次睇到一个势,就係依家呢个政府同以前好唔同。以前佢哋相信,只要同政府有一定程度之「默契」,大家按剧本做,一啲事慢慢可以水到渠成。依家Hello Kitty领袖一上场,推翻晒呢啲潜规则,咁样商家仲点信政府呢?同政府倾好之事,可以最后一刻推倒,政策冇延续性,仲点样做嘢?工商界出来「作反」,好有理由。

但有啲议员嘅取态,真係值得批评。好似代表文化界嘅马议员,响内会嗰阵居然投弃权票。我真係搲晒头。当日响立法会门口有咁大棚港视从业员示威,佢点会听不到、看不见?而且嗰个议案字眼清晰,唔含糊,冇理由要弃权吖?

仲好笑嘅係,上周佢同特首及财爷讲,点样响香港推动文化政策。呢头有几百人失业,仲有人响总部留守,但佢就响政府总部里面讲推动创意产业同文化政策,係咪好讽刺呢?今日係立法会会议,我当然呼吁马议员投赞成票,又睇实佢点样投票,点样响推动创意产业之同时,又继续俾几百人失业。不过,谂番转头,呢几百名失业大军,又唔係佢选民,马议员又点会有责任帮佢哋呢?不过,题外话,马议员,你话如果特权法唔过,会考虑司法覆核,但你有冇问下律师朋友,你唔係当事人,你有冇locus standi去覆核?如果未问就好问嘞,因为如果你冇又搞JR,市民以为你呃紧佢哋呀!


上一篇:
下一篇: